మలి వయస్సులో రెచ్చి పోతున్న సంగక్కరా - రికార్టు సెంచరీలతో మోత

హోబర్ట్, మార్చి 11: శ్రీలంక మాజీ కెప్టెన్, వికెట్‌కీపర్-బ్యాట్స్‌మన్ కుమార సంగక్కర వరుసగా నాలుగో శతకాన్ని నమోదు చేసి ప్రపంచ రికార్డు సృష్టించాడు. తిలకరత్నే దిల్షాన్ కూడా సెంచరీతో రాణించడంతో, ప్రపంచ కప్ క్రికెట్ చాంపియన్‌షిప్‌లో భాగంగా బుధవారం స్కాట్‌లాండ్‌ను ఎదుర్కొన్న శ్రీలంక 148 పరుగుల భారీ తేడాతో ఘన విజయాన్ని నమోదు చేసింది. 364 పరుగుల భారీ లక్ష్యాన్ని ఛేదించడంలో విఫలమైన స్కాట్‌లాండ్ 43.1 ఓవర్లలో 215 పరుగులకే ఆలౌటైంది. కాగా, శ్రీలంకకు ఇది నాలుగో విజయం. పూల్ ‘ఎ’లో ప్రస్తుతం ఎనిమిది పాయింట్లతో ఈ జట్టు న్యూజిలాండ్ (10 పాయింట్లు) తర్వాత, రెండో స్థానంలో ఉంది. అయితే, న్యూజిలాండ్-బంగ్లాదేశ్, ఆస్ట్రేలియా-స్కాట్‌లాండ్ జట్ల మధ్య గ్రూప్ మ్యాచ్‌లు పూర్తయిన తర్వాతే స్టాండింగ్స్‌పై స్పష్టత వస్తుంది.

టాస్ గెలిచి బ్యాటింగ్

టాస్ గెలిచిన శ్రీలంక కెప్టెన్ ఏంజెలో మాథ్యూస్ బ్యాటింగ్ ఎంచుకున్నాడు. ఆరో ఓవర్ మూడో బంతికి లాహిరు తిరిమానే (4) అవుట్‌కావడంతో మాథ్యూస్ నిర్ణయంపై తలెత్తిన అనుమానాలకు తిలకరత్నే దిల్షాన్, కుమార సంగక్కర తెరదించారు. రెండో వికెట్‌కు వీరు 195 పరుగుల భాగస్వామ్యాన్ని అందించారు. 99 బంతులు ఎదుర్కొని, 10 ఫోర్లు, ఒక సిక్సర్‌తో 104 పరుగులు చేసిన దిల్షాన్‌ను కల్లం మెక్‌లియోడ్ క్యాచ్ అందుకోగా, జొష్ డావీ అవుట్ చేయడంతో భారీ భాగస్వామ్యానికి తెరపడింది. మహేల జయవర్ధనే కేవలం 2 పరుగులు చేసి డావీ బౌలింగ్‌లోనే మెక్‌లియోడ్‌కు క్యాచ్ ఇచ్చి పెవిలియన్ చేరాడు. తర్వాతి బంతికే సంగక్కర వికెట్ కూడా కూలింది. అతను 139 నిమిషాలు క్రీజ్‌లో నిలిచి, 95 బంతులు ఎదుర్కొని, 13 ఫోర్లు, 4 సిక్సర్లతో 124 పరుగులు సాధించి, మాథ్యూ క్రాస్ క్యాచ్ పట్టడంతో వెనుదిరిగాడు. ఈ ప్రపంచ కప్‌లో సంగాకు ఇది వరుసగా నాలుగో సెంచరీ కావడం విశేషం. ఏంజెలో మాథ్యూస్ (51) కొంత సేపు నిలదొక్కుకొని ఆడగా, కుశాల్ పెరెరా (24), తిసర పెరెరా (7), సీక్కుగే ప్రసన్న (3), లసిత్ మలింగ (1) తక్కువ స్కోర్లకే వెనుదిరిగారు. చివరిలో కులశేఖర (18), దుష్మంత చమీరా (12) నాటౌట్‌గా నిలవగా, లంక 50 ఓవర్లలో 9 వికెట్ల నష్టానికి 363 పరుగుల భారీ స్కోరు సాధించింది.

మోంసెన్, కోల్మన్ పోరాటం వృథా

లంకను ఓడించేందుకు 364 పరుగుల భారీ లక్ష్యన్ని అందుకోవడానికి బ్యాటింగ్‌కు దిగిన స్కాట్‌లాండ్ ఆ ప్రయత్నంలో విఫలమైంది. కెప్టెన్ ప్రెస్టన్ మోంసెన్, ఫ్రెడ్డీ కోల్మన్ అర్ధ సెంచరీలతో జట్టును ఆదుకోవడానికి విఫలయత్నం చేశారు. మిగతా ఆటగాళ్లు అనుకున్న స్థాయిలో స్కోర్లు చేయలేకపోవడంతో స్కాట్‌లాండ్ ఇంకా 41 బంతులు మిగిలి ఉండగానే, 215 పరుగులకు ఆలౌటైంది. మోంసెన్ 75 బంతుల్లో 60, కోల్మన్ 74 బంతుల్లో 70 చొప్పున పరుగులు చేశారు. వీరు నాలుగో వికెట్‌కు 118 పరుగుల భాగస్వామ్యాన్ని అందించారు. కానీ, వీరి పోరాటం వృథా అయింది. లంక నాలుగో విజయాన్ని నమోదు చేసింది. సెంచరీ హీరో సంగాకు ప్లేయర్ ఆఫ్ ది మ్యాచ్ అవార్డు లభించింది.

టాప్ స్కోరర్

ఈ ఏడాది అన్ని ఫార్మెట్స్‌లో కలిపి అత్యధిక పరుగులు చేసిన బ్యాట్స్‌మన్‌గా కుమార సంగక్కర రికార్డు సృష్టించాడు. ఇప్పటికే అతను 1,025 పరుగులు తన ఖాతాలో వేసుకొని అగ్రస్థానాన్ని ఆక్రమించగా, కేన్ విలియమ్‌సన్ (న్యూజిలాండ్) 900 పరుగులతో రెండో స్థానంలో ఉన్నాడు.

వరల్డ్ కప్ టోర్నీలో సంగక్కర వరుసగా నాలుగవ, మొత్తం మీద 5వ శతకాన్ని సాధించాడు. సచిన్ తెండూల్కర్ 6 సెంచరీతో మొదటి స్థానంలో ఉండగా, రికీ పాంటింగ్‌తో కలిసి సంగా రెండో స్థానంలో నిలిచాడు.

వనే్డ ఇంటర్నేషనల్స్‌లో జహీర్ అబ్బాస్ (పాకిస్తాన్), సరుూద్ అన్వర్ (పాకిస్తాన్), హెర్చెల్ గిబ్స్ (దక్షిణాఫ్రికా), ఎబి డివిలియర్స్ (దక్షిణాఫ్రికా), క్వింటన్ డి కాక్ (దక్షిణాఫ్రికా), రాస్ టేలర్ (న్యూజిలాండ్) వరుసగా మూడు సెంచరీలు సాధించారు. ఆ రికార్డును సంగా అధిగమించాడు. ఈ వరల్డ్ కప్‌లో అతను బంగ్లాదేశ్‌పై 105, ఇంగ్లాండ్‌పై 117 (నాటౌట్), ఆస్ట్రేలియాపై 104, తాజాగా స్కాట్‌లాండ్‌పై 124 చొప్పున పరుగులు సాధించాడు.

ఒక వరల్డ్ కప్ టోర్నీలో మార్క్ వా, మాథ్యూ హేడెన్, సౌరవ్ గంగూలీ తలా మూడు సెంచరీలు చేయగా, సంగా నాలుగు సెంచరీలతో వారిని అధిగమించారు.

కీపింగ్‌లోనూ రికార్డే

వికెట్‌కీపింగ్‌లోనూ సంగా రికార్డు నెలకొల్పాడు. ప్రపంచ కప్ టోర్నీలో అతను ఇప్పటి వరకూ 54 మందిని అవుట్ చేశాడు. ఆడం గిల్‌క్రిస్ట్ (52 డిస్మిసల్స్), బ్రెండన్ మెక్‌కలమ్ (32 డిస్మిసల్స్) వరుసగా ద్వితీయ, తృతీయ స్థానాలను ఆక్రమించారు.

ఆస్ట్రేలియాలో ఆడిన వనే్డల్లో అత్యధిక పరుగులు చేసిన విదేశీ బ్యాట్స్‌మెన్ జాబితాలో సంగక్కర మూడో స్థానాన్ని సంపాదించాడు. డెస్మండ్ హేన్స్ 3,067, వివియన్ రిచర్డ్స్ 2,769 పరుగులతో మొదటి రెండు స్థానాల్లో ఉన్నారు. ఆసీస్‌లో సంగా సాధించిన పరుగులు 2,038.

20వ సెంచరీ భాగస్వామ్యం

తిలకరత్నే దిల్షాన్, కుమార సంగక్కర రెండో వికెట్‌కు 195 పరుగులు జోడించారు. వీరికి ఇది 20వ సెంచరీ భాగస్వామ్యం. వనే్డల్లో అత్యధిక సెంచరీ భాగస్వామ్యాలను సాధించిన రెండో జోడీగా వీరు రికార్డు పుటల్లోకి ఎక్కారు. సచిన్ తెండూల్కర్, సౌరవ్ గంగూలీ 26 సెంచరీ పార్ట్‌నర్‌షిప్స్‌తో ‘జోడీ నంబర్ వన్’గా కొనసాగుతున్నారు. ఆడం గిల్‌క్రిస్ట్, మాథ్యూ హేడెన్ 16 సెంచరీ భాగస్వామ్యాలను అందించి ఈ జాబితాలో మూడో స్థానంలో ఉన్నారు.

స్కోరుబోర్డు

శ్రీలంక ఇన్నింగ్స్: తిరిమానే సి మోంసెన్ బి ఇవాన్స్ 4, దిల్షాన్ సి మెక్‌లియోడ్ బి డావీ 104, సంగక్కర సి క్రాస్ బి డావీ 124, జయవర్ధనే సి మెక్‌లియోడ్ బి డావీ 2, మాథ్యూస్ సి కోల్మన్ బి మెక్‌చాన్ 51, కుశాల్ పెరెరా సి మెక్‌లియోడ్ బి రోబీ టేలర్ 24, తిసర పెరెరా సి కోల్మన్ బి బెరింగ్టన్ 7, ప్రసన్న సి కోల్మన్ బి ఇవాన్స్ 3, కులశేఖర నాటౌట్ 18, మలింగ సి లీస్క్ బి బెరింగ్టన్ 1, చమీరా నాటౌట్ 12, ఎక్‌స్ట్రాలు 13, మొత్తం (50 ఓవర్లలో 9 వికెట్లకు) 363.

వికెట్ల పతనం: 1-21, 2-216, 3-244, 4-244, 5-289, 6-326, 7-328, 8-331, 9-336.

బౌలింగ్: రోబీ టేలర్ 10-0-46-1, అస్‌డైర్ ఇవాన్స్ 10-0-72-2, జొష్ డావీ 8-0-63-3, బెరింగ్టన్ 6.1-0-31-2, మైఖేల్ లీస్క్ 7-0-63-0, కేల్ కోజర్ 4.5-0-39-0, మాట్ మచాన్ 4-0-46-1.

స్కాట్‌లాండ్ ఇన్నింగ్స్: కేల్ కోజర్ సి అండ్ బి మలింగ 0, కల్లం మెక్‌లియోడ్ బి కులశేఖర 11, మాట్ మచాన్ ఎల్‌బి దిల్షాన్ 19, ప్రెస్టన్ మోంసెన్ సి తిరిమానే బి తిసర పెరెరా 60, ఫ్రెడ్డీ కోల్మన్ సి తిసర పెరెనా బి కులశేఖర 70, రిచీ బెరింగ్టన్ సి కులశేఖర బి చమీరా 29, మైఖేల్ లీస్క్ సి సంగక్కర బి కులశేఖర 2, మాథ్యూ క్రాస్ సి సంగక్కర బి చమీరా 7, రోబీ టేలర్ సి తిసర పెరెరా బి మలింగ 3, జొష్ డావీ సి తిరిమానే బి చమీరా 4, అస్‌డైర్ ఇవాన్స్ నాటౌట్ 1, ఎక్‌స్ట్రాలు 9, మొత్తం (43.1 ఓవర్లలో ఆలౌట్) 215.

వికెట్ల పతనం: 1-0, 2-26, 3-44, 4-162, 5-189, 6-192, 7-200, 8-209, 9-210, 10-215.

బౌలింగ్: మలింగ 9-0-29-2, కులశేఖర 7-0-20-3, తిసర పెరెరా 7-0-41-1, దిల్షాన్ 5-0-15-1, ప్రసన్న 8-0-57-0, చమీరా 7.1-0-51-3.

రికార్డు సెంచరీ..

సంగక్కర

తిలకరత్నే దిల్షాన్