అమెరికా సాయం కోరనున్న భారత్‌

అమెరికా సాయం కోరనున్న భారత్‌
చెన్నై, జూలై 30,
ఇటీవల గల్లంతైన ఏఎన్‌-32 విమానం ఆచూకీ తెలుసుకునేందుకు భారత్‌ అమెరికా సాయాన్ని కోరింది. విమానానికి సంబంధించి ఎలాంటి సిగ్నల్స్‌ అందలేదని..విమానం ఆచూకీ తెలుసుకునేందుకు యూఎస్‌ రక్షణశాఖ సాయాన్ని కోరామని కేంద్ర మంత్రి మనోహర్‌ పారికర్‌ వెల్లడించారు. ఇండియన్‌ ఎయిర్‌ఫోర్స్‌కు చెందిన ఏఎన్‌-32 విమానం ఈ నెల 22న చెన్నై నుంచి పోర్ట్‌బ్లెయిర్‌కు బయలుదేరిన సమయంలో గల్లంతైన విషయం తెలిసిందే. విమానం కోసం ఇప్పటికే వైమానిక, తీర ప్రాంత రక్షణ దళాలు, నావికాదళాలు గాలింపు చర్యలు చేపట్టింది.

రేప్‌ బాధితుల కోసం క్లినిక్‌

 రేప్‌ బాధితుల కోసం క్లినిక్‌
లండన్‌, జూలై 30,
ఒకప్పుడామె అత్యాచార బాధితురాలు.. ఎలాగో బతికి బట్టకట్టినా ఎంతో నరకం అనుభవించింది. తనలా ఎవరూ బాధపడకూడదని నిశ్చయించుకుని రేప్‌ కు గురైన వారికి అండగా నిలబడింది. యునైటెడ్‌ కింగ్‌ డమ్‌ లో మొదటిసారిగా ఓ ప్రవాస భారతీయురాలు రేప్‌ బాధితులకోసం క్లినిక్‌ ను ప్రారంభించింది.. పవన్‌ అమారా అనే ఆ మహిళ- రేప్‌ విక్టిమ్స్‌ కోసం లండన్‌ లో ఓ చారిటీని మొదలు పెట్టి నలుగురికీ సహాయపడుతోంది .పంజాబ్‌ రాష్ట్రానికి చెందిన అమారా ఫ్యామిలీ లండన్‌ లోని సెంయింట్‌ బార్తోల్మూస్‌ లో మై బాడీ బ్యాక్‌ అన్న ఎన్జీవో ను 2014 లో ప్రారంభించారు. బార్ట్‌ హెల్త్‌ ఎన్‌ హెచ్‌ ఎస్‌ ట్రస్ట్‌, మై బాడీ బ్యాక్‌ సంయుక్తంగా ఓ మెటర్నరీ క్లినిక్‌ ను నడిపిస్తున్నాయి. దీంట్లో ట్రీట్‌ మెంట్‌ తీసుకోవాలనుకునే వాళ్లు మెయిల్‌ ద్వారా అపాయింట్‌ మెంట్‌ తీసుకోవచ్చని వెల్లడించారు సిబ్బంది. ఈ క్లినిక్‌ లో అమారా, మిడ్‌ వైఫ్‌ ఇంద్రజిత్‌ కౌర్‌, గైనకాలజిస్టు రెహానా ఖాన్‌ లు రేప్‌ విక్టిమ్స్‌ కు సరైన్‌ కేర్‌ తీసుకుంటారని తెలిపారు.బ్రిటన్‌ లో మహిళలపై అత్యాచారాలు విపరీతంగా పెరుగుతున్నాయని పోలీసుల తాజా లెక్కలు తెలుపుతున్నాయి. గతేడాది కంటే ఈ సారి 20 నుంచి 22 శాతం మహిళలపై అఘాయిత్యాలు పెరిగినట్టు వివరించారు. మహిళలే నడుపుతున్నందున స్పెషల్‌ కేర్‌ ఉంటుందన్నారు మై బాడీ బ్యాక్‌ స్టాఫ్‌. రేప్‌ కు గురైన వాళ్ల బాధలను అర్థం చేసుకొని వాళ్లకు అతి సున్నితంగా ట్రీట్‌ మెంట్‌ అందిస్తామని తెలిపారు. ఈ క్లినిక్‌ లో ప్రెగ్నెన్సీ కేర్‌, బ్రెస్ట్‌ ఫీడింగ్‌, ప్రీ, పోస్ట్‌ డెలివరీ సర్వీసెస్‌, లేబర్‌ కేర్‌, వుమన్‌ కేర్‌ సర్వీసులు అందిస్తారు. 

చెన్నై: తమిళనాడు ఎన్నికల్లో ఉచిత బహుమతుల వాన

 చెన్నై:
మొబైల్‌ ఫోన్‌, ల్యాప్‌టాప్‌, రుణమాఫీ, ఉచిత విద్యుత్తు. ఎన్నికల సీజన్‌లో తమిళనాడులో ఉచిత బహుమతుల వాన కురుస్తున్నది. ప్రణాళికల్లో, వాగ్దానాల రూపంలో ఎవరెన్ని ఉచిత సరుకులివ్వగలరన్న దానికి పోటీపడుతున్నారు. డీఎంకే తన ప్రణాళిక ప్రచురించిన తర్వాత, ఎన్నికలకు కేవలం పది రోజుల
ముందు ఏఐఏడీఎంకే నాయకురాలు జయలలిత తన ఎన్నికల మ్యానిఫెస్టోలో హామీలు గుప్పించారు. ఏఐఏడీఎంకే ఈసారి ప్రణాళికలో చెప్పిందేమంటే....
తాము మళ్ళీ అధికారంలోకి వస్తే వ్యవసాయ రుణం పూర్తిగా మాఫీ చేస్తామన్నారు. రేషన్‌ కార్డున్న ప్రతి ఒక్కరికీ మొబైల్‌ ఫోన్‌ ఇస్తారు. 10, 12వ తరగతి విద్యార్థులకు ఇంటర్నెట్‌తో సహా ల్యాప్‌టాప్‌లు, రాష్ట్ర ప్రభుత్వ సంస్థ 'అరస' నుండి టీవీ కనెక్షన్‌ కోసం సెట్‌ టాప్‌ బాక్స్‌ ఉచితంగా ఇస్తామన్నారు. 100 యూనిట్ల వరకు విద్యుత్‌ వాడకానికి ఛార్జీలు చెల్లించక్కర్లేదు. దీనివల్ల సుమారు 78 లక్షల కుటుంబాలకు మినహాయింపు లభిస్తుంది. సర్వత్రా ఉచితంగా
వైఫై కనెక్షన్‌ హామీ కూడా ఇచ్చారు. అన్నిటికంటే ఆకర్షణీయమైన హామీ మహిళలకు స్కూటర్‌ / మోపెడ్‌ కొనుక్కోడానికి 50 శాతం ధర ప్రభుత్వం
చెల్లిస్తుంది. 'అమ్మ' గారి తాయిలాల సంచి నుండి ఉప్పొంగుతున్న హామీలకు కారణం గత కొద్ది రోజులుగా ఏఐడీఎంకే ప్రజాభిమానంలో కొంత కొరత
ఏర్పడటమే. హామీల పరుగులో డీఎంకే పెద్ద సవాలే చేసింది. తాను అధికారంలోకి వస్తే 16 లక్షలమంది పాఠశాల విద్యార్థులకు ల్యాప్‌టాప్‌ ఇస్తామని
ప్రకటించారు. పేద కుటుంబాల వారందరికీ స్మార్ట్‌ ఫోన్‌ ఇస్తామన్నారు. వ్యవసాయ, విద్యా రుణ మాఫీ, విద్యుత్‌-పాల ధర తగ్గింపు ప్రకటించారు. జయలలిత తన ప్రణాళికలో వీటన్నిటితో పాటు తనవి కొన్ని జోడించారు. సాధారణంగా లెక్కలు వేసి చూస్తే తెలుస్తున్నది ఏమంటే ఏఐడీఎంకే ప్రణాళికా హామీలు అమలుపర్చడానికి ఏడాదికి రు.10 వేల కోట్లు అదనంగా ఖర్చవుతుంది. తమిళనాడులో విద్యా రుణాల పరిమాణం 2015 మార్చి 31 నాటికి రు.16,482 కోట్లు ఉంది. ప్రధాన ప్రత్యర్థులు ఇద్దరూ ఈ రుణమాఫీ హామీ ఇవ్వటంతో ఈ బరువు రాష్ట్ర ఖజానాయే భరించాల్సి ఉంటుంది. తమిళనాడులో ఈ విధంగా సరుకులు, సేవలు పంపకం కొత్తేమీ కాదు. తమిళనాడులో రు.2/-లకు కిలో బియ్యం పథకం చాలాకాలం క్రిందే అమలులోకి వచ్చింది. ఆ తర్వాత అది దేశమంతటా విస్తరించింది.
ఎం.జి.రామచంద్రన్‌ ముఖ్యమంత్రిగా ఉండగా ప్రవేశపెట్టిన పాఠశాలల్లో మధ్యాహ్న భోజన పథకం పిల్లలు బడి మానేసే రేటును
తగ్గించింది. తర్వాత అది జాతీయ పథకంగా 'మిడ్‌ డే మీల్‌' పేరుతో దేశంలో ఇతరత్రా విస్తరించింది. విద్యార్థినులకు సైకిళ్ళు ఇచ్చే పథకం కూడా
తమిళనాడులోనే మొదలైంది. క్రమంగా దీరెకాలపు ఆర్థిక సామాజిక కార్యక్రమాలకు బదులు సరుకులు చేతికందించడం ద్వారా ఓట్లు అడిగే ప్రక్రియ
బలపడింది. కలర్‌ టీవీ, ల్యాప్‌టాప్‌, వంటింటి సామాగ్రి - ఈ మూడు పథకాల వల్ల ఒక దశాబ్దంలో రాష్ట్ర ప్రభుత్వం రు.11,561 కోట్లు ఖర్చు పెట్టింది.
ఇదికాక తమిళనాడు ప్రభుత్వం పంచెలు, చీరలు, చెప్పుల కొరకు కూడా వందల కోట్ల రూపాయలు ఖర్చు పెట్టింది. ఈ విధంగా ఉచితంగా హామీలతో
తమిళనాడు ఆర్థిక వ్యవస్థకి నష్టం జరుగుతున్నదా లేదా అనే ప్రశ్న కూడా ఇప్పుడు చర్చనియాంశమవుతున్నది.

ఫేస్‌ బుక్‌ నుంచి సరికొత్త యాప్‌

సోషల్‌ మీడియా దిగ్గజం ఫేస్‌బుక్‌ కొత్త ఆవిష్కరణతో భారత కంపెనీలను ఆకట్టుకుంటోంది. ఫేస్‌ బుక్‌ ఎట్‌ వర్క్‌ః అనే సర్వీసును కొన్ని నెలల్లో భారత్‌లో ఆవిష్కరించనుంది. ఇప్పటికే ఈ సర్వీసు చాలా ప్రాముఖ్యం పొందింది. భారత్‌ ఈ సర్వీసును ఆవిష్కరించడం ఓ మైలురాయి లాంటిదని ఫేస్‌ బుక్‌ ఎగ్జిక్యూటివ్‌లు అభివరి?ంచారు. ప్రపంచవ్యాప్తంగా ఈ యాప్‌ కు వచ్చిన ఆదరణతో భారత్‌ లో కూడా అన్ని వ్యాపారాల్లో దీన్ని టెస్ట్‌ చేసేందుకు సిద్ధమయ్యామని ఫేస్‌ బుక్‌ ఎట్‌ వర్క్‌ డైరెక్టర్‌ జూలియన్‌ కోడోర్‌ నియో తెలిపారు. విశ్వవ్యాప్తంగా ఈ యాప్‌ విజయవంతం కావడం తమకు ఆనందదాయకంగా ఉందని, భారత్‌ లోని అన్ని వ్యాపారాలతో కలిసి పనిచేసేందుకు ప్రస్తుతం ద ష్టి సారిస్తున్నామని పేర్కొన్నారు.
తోటి ఉద్యోగులతో కలిసి సమర్థవంతంగా పనిచేసుకోవడానికి, పరస్పరం సహకరించుకోవడానికి ఫేస్‌ బుక్‌ ఎట్‌ వర్క్‌ కొత్త ప్లాట్‌ ఫాం అని, పనిస్థలాల్లో ఉత్పాదకతను ఇది పెంచుతుందని చెప్పారు. ప్రపంచవ్యాప్తంగా ఉన్న బ్యాంకింగ్‌, టెలికమ్యూనికేషన్‌, ట్రావెల్‌, రిటైల్‌, రియల్‌ ఎస్టేట్‌ రంగాల్లో ఈ యాప్‌ విజయవంతమైంది. భారత కంపెనీలు ఎల్‌ అండ్‌ టీ, ఇనోాటెేక్‌, గోద్రెజ్‌, ఎస్‌ బ్యాంకు, యూఎస్టీ గ్లోబల్‌, పేటైమ్‌, జుమోటో, బుక్‌ మై షో, ఆస్క్‌ మీ, అర్బన్‌ లాడర్‌, టెలినార్‌, విజన్‌ ఇండియా ఫౌండేషన్‌, ల్యాండ్‌ మార్క్‌ గ్రూప్‌ వంటి కంపెనీలు ఇప్పటికే ఫేస్‌ బుక్‌ ఎట్‌ వర్క్‌ ను వాడుతున్నాయని జూలియన్‌ తెలిపారు. మొబైల్‌ ఫోన్‌ వినియోగదారులకు ఈ యాప్‌ ఎంతో సహకరిస్తుందని చెప్పారు. ఈ సోషల్‌ మీడియా దిగ్గజం ద్వారా న్యూస్‌ ఫీడ్‌ ను, గ్రూప్స్‌ ను, మెసేజ్‌ లను, ఈవెంట్లను, సెర్చ్‌ వంటి ఎన్నో ఫీచర్లను ఫేస్‌ బుక్‌ ఎట్‌ వర్క్‌ షేర్‌ చేస్తుంది. 

జపాన్‌ను మరోసారి కుదిపేస్తున్న భూప్రకంపనలు..

జపాన్‌ను మరోసారి కుదిపేస్తున్న భూప్రకంపనలు..

సెంట్రల్‌ డెస్క్‌, ఏప్రిల్‌ 16:
జపాన్‌లోని కుమమోటోలో మరోసారి భూప్రకంపనలు సంభవించాయి. రెండు రోజుల క్రితం సంభవించిన భూకంపం నుంచి తేరుకోకముందే ఈరోజు మళ్లీ భూమి కంపించడంతో ప్రజలు బెంబెలెత్తిపోతున్నారు. క్యూషూ ప్రాంతంలో ఈ రోజు తెల్లవారుజామున రిక్టర్‌స్కేల్‌పై భూకంప తీవ్రత 7.3గా నమోదైంది. ఈ ఘటనలో ఏడుగురు మృతి చెందినట్లు, 400 మందికి పైగా గాయపడినట్లు సమాచారం. ఆస్తి, ప్రాణ నష్టంపై పూర్తి వివరాలు తెలియాల్సి ఉంది. ఈ ఘటన సంభవించిన కొంద్ది గంటల్లోనే 5.4 తీవ్రతతో మరోసారి ప్రకంపనలు మొదలయ్యాయి. భూకంప కేంద్రం మొన్నటి భూకంప కేంద్రానికి ఆగ్నేయంలో 12 కి.విూ దూరంలో ఉన్నట్లు గుర్తించారు. భూమికి 10 కిలోవిూటర్ల లోతులో ఇది ఉన్నట్లు అధికారులు పేర్కొన్నారు. వరుస భూకంపాలతో ఇప్పటివరకు 29 మంది మృతిచెందారు. 400 మందికి పైగా గాయపడ్డారు. శిథిలాలను తొలగించేందుకు సహాయకచర్యలు కొనసాగుతున్నాయి. భవన శిధిలాల క్రింద దాదాపు 23 మంది చిక్కుకున్నట్లు నిర్దారించారు. ఘటనలో మృతుల సంఖ్య మరింత పెరిగే అవకాశముందని అధికారులు వెల్లడించారు. పలు ప్రాంతాల్లో ఇళ్లకు విద్యుత్‌, నీటి సరఫరా నిలిపివేసారు.
భుకంప విలయతాండవాన్ని స్థానిక టీవీ ఛానళ్లు చూపిస్తున్నాయి. బోల్తా పడిన వాహనాలు, తెగిపోయిన రహదారులు, కొండచరియలు విరిగిపడే దృశ్యాలు టీవీల్లో ప్రసారమయ్యాయి. క్యూషూ ప్రాంతంలో ఈ ఏడాది ఇంతవరకు 165 సార్లు భుమి కంపించింది. 375 శిబిరాల్లో దాదాపు ఏడువేలమంది భాదితులు తలదాచుకుంటున్నారు. 

భారత్‌లో పెట్టుబడులకు అనుకూల వాతావరణం ఉంది : ప్రధాని

భారత్‌లో పెట్టుబడులకు అనుకూల వాతావరణం ఉంది : ప్రధాని

భారత్‌లో పెట్టుబడులు పెట్టేందుకు ఇదే సరైన సమయమని ప్రధానమంత్రి నరేంద్రమోదీ అన్నారు. భారత్‌ కు వున్న 7500 కీలోవిూటర్ల సముద్రతీరం పలు రకాల పెట్టుబడులకు అనువుగా వుందని ప్రధాని అన్నారు. ముంబయిలో ఏర్పాటు చేసిన 'మారిటైమ్‌ ఇండియా' సదస్సును గురువారం ప్రధాని ప్రారంభించారు. ఈ సందర్భంగా ఆయన మాట్లాడుతూ... నౌకాశ్రయాలు, అంతర్గత జలరవాణా వ్యవస్థలను అధునీకరించాల్సిన అవసరముందన్నారు. అది సముద్రమార్గం ద్వారా అయితే ఇంకా మంచిదని పేర్కొన్నారు. దేశంలో 'మారిటైమ్‌ ఇండియా' సదస్సు నిర్వహించటం ఇదే తొలిసారని పేర్కొన్నారు. సాగరమాల పథకం, పెట్టుబడులకు గల అవకాశాలను ఆయన ఈ సందర్భంగా వివరించారు. ఈ గ్లోబల్‌ సమ్మిట్‌ మూడు రోజుల పాటు జరగనుంది. సమ్మిట్‌ ద్వారా రూ. 82 వేల కోట్ల ఒప్పందాలు కుదిరే అవకాశాలున్నాయి. దాదాపు 41 దేశాల నుంచి 300 ప్రతినిధులతో పాటు 3 వేల మంది సమ్మిట్‌లో పాల్గొంటున్నారు. దక్షిణ కొరియా భాగస్వామిగా ఈ ప్రపంచస్థాయి సదస్సు జరుగుతుంది.
ప్రధాని మాట్లాడుతూ.. రవాణా మార్గాల్లో సముద్ర రవాణా చాలా విస్తృత పరిధి కలిగిఉంది. ఇది పర్యావరణ హితమైన రవాణా కూడా. అత్యంత చౌకయినది. సముద్రయానం మన జీవన విధానం, వాణిజ్య పద్దతులు సముద్ర ఆవరణను కలుషితం చేయకూడదు. భారత్‌ మొదటిసారిగా ఈ గ్లోబల్‌ ఈవెంట్‌ను నిర్వహిస్తుంది. బాబాసాహెబ్‌ విజన్‌కు కట్టుబడి మా ప్రభుత్వం జాతీయ జల రవాణాను ముందుకు తీసుకుపోనుంది. పోర్టుల ఆధునీకరణ, సెజ్జులు, పోర్ట్‌ ఆధారిత స్మార్ట్‌ సిటీస్‌, పారిశ్రామిక పార్కులు, గిడ్డంగులు, లాజిస్టిక్స్‌ పార్క్స్‌ను అభివృద్ధి పరిచి ఆధునీకరించనున్నామని అన్నారు.
ఈ సందర్భంగా ప్రధాని సాగర్‌ మాల పథకం వివరాలను అవిష్కరించారు. దేశంలోని నౌకాశ్రయాల సామర్ధ్యాలను 2025 నాటికి 3000 టన్నుల లక్ష్యంగా పెట్టుకున్నామని అన్నారు. ఈ కార్యక్రమంలో కేంద్ర ఉపరితల రవాణ శాఖా మంత్రి నితిన్‌గడ్కరీ, మహారాష్ట్ర గవర్నర్‌ విద్యాసాగర్‌రావు, ముఖ్యమంత్రి ఫడ్ణవీస్‌ తదితరులు పాల్గొన్నారు. 

ముంబై దాడులు పాక్ కుట్రే - హేడ్లి

న్యూఢిల్లీ: పాక్ గూఢచార సంస్థ ఐఎస్‌ఐ, ఇస్లామిక్ తీవ్రవాద సంస్థ లష్కరే తోయిబాతో కలిసి భారత ఉప రాష్టప్రతి భవనం, ఇండియా గేట్, భారత గూఢచార సంస్థ కేంద్ర కార్యాలయాలను పేల్చేయాలని అనుకుందని పాక్- అమెరికన్ తీవ్రవాది డేవిడ్ కోల్మన్ హెడ్లీ వెల్లడించినట్టు తెలిసింది. డేవిడ్ హెడ్లీ సోమవారం ముంబయిలోని ప్రత్యేక తీవ్రవాద కోర్టులో టెలికాన్ఫరెన్స్ ద్వారా సాక్ష్యం చెప్పనున్నారు. ముంబయి దాడికి సంబంధించిన పూర్తి వివరాలను ఆయన కోర్టుకు తెలియజేస్తారు. లష్కరే తోయిబాకు చెందిన పదిమంది ముష్కరులు 2008 నవంబర్ 26న ముంబయిలో ఎనిమిదిచోట్ల బాంబులు పేల్చి, విచ్చిలవిడి కాల్పులతో 150 మందిని పొట్టన పెట్టుకున్న సంఘటన వెనుక పాక్ హస్తం, ఐఎస్‌ఐ ఉందని హెడ్లీ చెప్పారు. జాతీయ దర్యాప్తు సంస్థ ఆదివారం జరిపిన విచారణలో హెడ్లీ ఈ విషయాలు వెల్లడించినట్టు చెబుతున్నారు. ప్రస్తుతం అమెరికా జైల్లో 36ఏళ్ల శిక్ష అనుభవిస్తున్న హెడ్లీని ఎన్‌ఐఏ ఎప్పుడు ఎలా విచారించిందనేది వెల్లడికాలేదు. అయితే జాతీయ భద్రత వ్యవహారాల సలహాదారు అజీత్ దోవల్ చేసిన కృషి మూలంగా హెడ్లీ సోమవారం వీడియో కాన్ఫరెన్స్ ద్వారా 26/11 కేసును దర్యాప్తు చేస్తున్న కోర్టులో తన వాదన వినిపించనున్నట్టు ప్రత్యేక పబ్లిక్ ప్రాసిక్యూటర్ ఉజ్వల్ నిఖ్కం తెలిపారు. భారత ప్రభుత్వం క్షమాభిక్ష పెట్టేందుకు అంగీకరించినందుకు బదులుగా హెడ్లీ రేపు కోర్టులో సాక్ష్యం చెప్పనున్నట్టు తెలిసింది. పాక్ గూఢచార సంస్థ ఐఎస్‌ఐ ఆమోదం మేరకే లష్కరే తోయిబా 26/11 దాడికి పాల్పడినట్టు ఒప్పుకున్నారు. ఐఎస్‌ఐకు చెందిన మేజర్ ఇక్బాల్, సమీర్ అలీ, లష్కరే తోయిబాకు చెందిన జకీ ఉర్ రెహమాన్ లఖ్వి నాతో పనులు చేయించేవారు. ముంబయిలో ఏ ప్రాంతాల్లో రెక్కీ చేయాలి, ఏ సమాచారం కావాలనేది వారు చెప్పేవారని హెడ్లీ వెల్లడించాడు. ఐఎస్‌ఐకు చెందిన బ్రిగేడియర్ రివాజ్, లష్కరే తోయిబాకు చెందిన జకీ ఉర్ రెహమాన్‌కు పనులు పురమాయించే వారని హెడ్లీ తెలిపారు. 26/11 కోసం హెడ్లీ ముంబయితోపాటు పలు ప్రాంతాల్లో రెక్కీ చేయటం తెలిసిందే. ఐఎస్‌ఐ, లష్కరే తోయిబా ఆదేశం మేరకు తాను ముంబయిలోని తాజ్ హోటల్, ఇతర ప్రాంతాలతోపాటు ఢిల్లీలోని భారత ఉప రాష్టప్రతి నివాసం, ఇండియా గేట్, సిజిఓ కాంప్లెక్స్‌లోని భారత గూఢచార సంస్థ సిబిఐ కేంద్ర కార్యాలయాన్ని రెక్కీ చేసినట్టు హెడ్లీ ఎన్‌ఐఏ విచారణలో వెల్లడించారు. హెడ్లీ రెక్కీ జరిపిన తరువాతే లష్కరే తోయిబాకు చెందిన 10మంది ఇస్లామిక్ తీవ్రవాదులు సముద్రమార్గంలో వచ్చి ముంబయిపై దాడి చేయటం తెలిసిందే.

ముంబయి దాడిని అమెరికా తదితర పాశ్చాత్య దేశాలు గట్టిగా ఖండించిన అనంతరం అరెస్టయిన జకీ ఉర్ రెహమాన్ లఖ్విని ఐఎస్‌ఐ అప్పటి డైరక్టర్ సుఝా పాషా జైలులో కలిశారనేది కూడా హెడ్లీ బయటపెట్టారు. ముంబయి, ఢిల్లీలో తాను రెక్కీ చేసేందుకు ఐఎస్‌ఐ నిధులు సమకూర్చిందనేది కూడా ఆయన అంగీకరించినట్టు సమాచారం. 2008లో ముంబయిపై లష్కరే తోయిబా జరిపిన దాడికి పాక్ ప్రభుత్వం మద్దతు ఉందనేది కూడా ఆయన వెల్లడించారు. 2008 ముంబయి దాడికి కుట్ర చేసినందుకు హెడ్లీ ప్రస్తుతం అమెరికాలో జైలు శిక్ష అనుభవిస్తున్నారు. భారత కోర్టులో సాక్ష్యం చెప్పేందుకు మొదట నిరాకరించినా, కేంద్ర ప్రభుత్వం అమెరికాపై వత్తిడి తీసుకురావటంతో అమెరికా అధ్యక్షుడు బరాక్ ఒబామా జోక్యం మూలంగా హెడ్లీ ఈ కేసులో అప్రూవర్‌గా మారినట్టు తెలిసింది.

ఉగ్రవాదుల దిగ్బంధం

కాబూల్, జనవరి 4: అఫ్గాన్‌స్తాన్ పట్టణమైన మజార్-ఎ-షరీఫ్‌లోని భారత్ కాన్సిలేట్‌పై ఉగ్రవాదులు దాడి జరిపిన నేపథ్యంలో సోమవారం కూడా పలు పేలుళ్లు, కాల్పుల శబ్దాలతో ఆ ప్రాంతం దద్దరిల్లిపోయింది. ఇందులో నక్కిన ఉగ్రవాదులను ఏరివేసేందుకు అఫ్గాన్ భద్రతా దళాలు ప్రత్యేక ఆపరేషన్ నిర్వహించాయి. ఈ దాడికి ఎవరు పాల్పడ్డారన్నదానిపై ఎలాంటి ప్రకటనా వెలువడనప్పటికీ ఆరుగురు మిలిటెంట్లతో హోరాహోరీ పోరు కొనసాగుతూనే వుందని ప్రభుత్వ వర్గాలు చెబుతున్నాయి. భారత కాన్సలేట్‌కు సమీపంలోని ఓ భవనంలో ఉన్న మిలిటెంట్లు తీవ్రస్థాయిలో కాల్పులు సాగిస్తున్నట్లు వెల్లడించాయి. ఈ ప్రాంతాన్ని పూర్తిగా దిగ్బంధం చేసిన దళాలు వారిని పట్టుబెట్టేందుకు అన్ని మార్గాల్లోనూ ముందుకు సాగుతున్నాయి. మిలిటెంట్లు అందరూ భారత కాన్సలేట్‌ను పేల్చివేయాలనే ఉద్దేశంతోనే ఈ దాడికి పాల్పడినట్లు చెబుతున్నారు. అయితే వీరిని భద్రతా దళాలు ముందుగానే గుర్తించడంతో భారత కాన్సలేట్‌కు సమీపంలోని ఒక భవనంలోకి చొరబడ్డారని అక్కడి నుంచే కాల్పులు జరుపుతున్నారని చెబుతున్నారు.

భారత సిబ్బంది సురక్షితం

అఫ్గాన్‌లోని భారత కాన్సలేట్‌పై ఉగ్రవాదులు దాడి జరిపిన నేపథ్యంలో అందులో ఉన్న భారత దౌత్య సిబ్బంది సురక్షితంగానే ఉన్నారని దేశ రాయబారి వెల్లడించారు. ఈ ప్రాంతాన్ని పూర్తిగా సురక్షితం చేసేందుకు, మిలిటెంట్లను ఏరివేసేందుకు అఫ్గాన్ దళాలు యుద్ధప్రాతిపదికన ముందుకు పోతున్నాయిని భారత రాయబారి అమర్ సిన్హా వెల్లడించారు. ఆదివారం రాత్రి పొద్దుపోయిన తర్వాత దాదాపు 20 నిమిషాల పాటు అఫ్గాన్ దళాలకు, మిలిటెంట్లకు మధ్య కాల్పులు జరిగాయని ఆయన వెల్లడించారు. అయితే మిలిటెంట్లు ఎవరూ భారత కాన్సలేట్‌లోకి ప్రవేశించలేకపోయారని తెలిపారు.

అఫ్గాన్ ప్రజలకు అండ: మోదీ

ఉగ్రవాద సమస్యను ఎదుర్కొంటున్న అఫ్గాన్ ప్రజలకు పూర్తి స్థాయిలో సహాయ, సహకారాలు అందిస్తామని భారత ప్రధాని నరేంద్ర మోదీ స్పష్టం చేశారు. మజార్-ఎ-షరీఫ్‌లోని భారత కాన్సలైట్‌పై మిలిటెంట్ల దాడి నేపథ్యంలో అఫ్గాన్ అధ్యక్షుడు అష్రాఫ్ గనీ భారత ప్రధానికి ఫోన్ చేసి తాజా పరిస్థితిని వివరించారు. ఈ సందర్భంగా మాట్లాడిన మోదీ అఫ్గాన్ ప్రజలకు భారత్ అండగా ఉంటుందని తెలిపారు. పఠాన్‌కోట్‌పై ఉగ్రవాదులు జరిపిన దాడిని అఫ్గాన్ అధ్యక్షుడు ఖండించారు.

అఫ్గానిస్తాన్‌లో భారత కాన్సులేట్‌పై ఉగ్రవాదుల దాడి

కాబూల్, జనవరి 3: అఫ్గానిస్తాన్ పట్టణమైన మజారీ షరీఫ్‌లోని భారత కాన్సులేట్ కేంద్రంపై ఆదివారం గుర్తు తెలియని కొంత మంది ఉగ్రవాదులు దాడికి పాల్పడ్డారు. రెండు పేలుళ్లు, అనంతరం జరిగిన కాల్పుల నేపథ్యంలో వీరందరూ భారత కాన్సులేట్ ప్రాంగణంలోకి ప్రవేశించేందుకు ప్రయత్నించినట్లు ప్రభుత్వ ప్రతినిధి ఒకరు తెలిపారు. అయితే ఈ దాడిలో ఎంతమంది గాయపడినదీ, అలాగే ఈ భవనానికి ఏదైనా నష్టం జరిగిందా అనే వివరాలు వెంటనే వెలుగులోకి రాలేదు. పఠాన్‌కోట్ వైమానిక కేంద్రంపై పాకిస్తాన్ మిలిటెంట్లు జరిగిన దాడి ప్రకంపనలు సృష్టిస్తున్న నేపథ్యంలో అఫ్గాన్‌లోని భారత కాన్సులేట్‌పై ఈ దాడి జరగడం దిగ్భ్రాంతిని కలిగిస్తోంది

ఇస్రో విశ్వశోధన

మొన్న చంద్రుడి వైపు చూపు… నిన్న అంగారకుడిపై అన్వేషణ… నేడు విశ్వాంతరాళ శోధనకు శ్రీకా రం… ఇంతింతై వటుడింతై అన్న చందంగా ఇస్రో సాగిస్తున్న అంతరిక్ష ప్రస్థానమిది. భారతదేశ తొలి స్పేస్‌ అబ్జర్వేటరీ ‘ఆసో్ట్రశాట్‌’ను ఇస్రో సోమవారం విజయవంతంగా ప్రయోగించింది. ఇప్పటి వరకు అమెరికా, జపాన్‌, రష్యా, యూరోప్‌ మాత్రమే స్పేస్‌ అబ్జర్వేటరీలను కలిగి ఉన్నాయి. ఇస్రో నమ్మినబం టు పీఎస్‌ఎల్‌వీ.. ఆసో్ట్రశాట్‌తోపాటు అమెరికాకు చెందిన 4 ఉపగ్రహాలు సహా మొత్తం 6 విదేశీ ఉపగ్రహాలను విజయవంతంగా అంతరిక్షంలోకి తీసుకెళ్లింది. అమెరికాకు చెందిన3wsz ఉపగ్రహాలను ఇస్రో ప్రయోగించడం ఇదే తొలిసారి. అమెరికా అధ్యక్షుడు బరాక్‌ ఒబామాతో భారత ప్రధాని మోదీ భేటీకి కొద్ది గంటల ముందు ఈ ప్రయోగం జరగడం యాదృచ్ఛికం. జూ నాలుగు అమెరికా ఉపగ్రహాలు సహా 6 విదేశీ ఉపగ్రహాల ప్రయోగం విజయవంతం పీఎస్‌ఎల్‌వీకి 30వ విజయం :ఇరవై రెండేళ్ల సుదీర్ఘ ప్రస్థానంలో పీఎస్‌ఎల్‌వీకి ఇది 30వ విజయం. తొలి పీఎస్‌ఎల్‌వీ రాకెట్‌ను 1993 సెప్టెంబరు 20న ఇస్రో ప్రయోగించింది. నాటినుంచి నేటిదాకా పీఎస్‌ఎల్‌వీని 31 సార్లు ప్రయోగిస్తే తొలిసారి మినహా మిగిలిన 30సార్లు గ‘ఘన’ విజయాలను నమోదు చేసింది. శ్రీహరికోట సెప్టెంబరు 28: దేశీయ స్పేస్‌ పోర్టు నెల్లూరు జిల్లాలోని శ్రీహరికోట షార్‌ కేంద్రం.. సోమవారం ఉదయం 10 గంటలు.. ప్రథమ ప్రయోగ వేదికపై రోదసిలోకి దూసుకెళ్లేందుకు సిద్ధంగా పీఎస్‌ఎల్‌వీ-సీ30.. కౌంట్‌డౌన్‌ చివరి దశకు చేరుకుంది.. జీరోపాయింట్‌లోని మిషన్‌ కంట్రోల్‌ సెంటర్‌లో కంప్యూటర్ల ముందున్న శాస్త్రవేత్తల్లో ఒకింత ఉత్కంఠ.. కౌంట్‌డౌన్‌ జీరోకు చేరుకుంది.. ఒక్కసారిగా రాకెట్‌ అడుగుభాగాన అమర్చిన 6 బూస్టర్లు నిప్పులు చిమ్మగా సంధించిన బాణంలా పీఎస్‌ఎల్‌వీ-సీ30 రోదసిలోకి దూసుకెళ్లింది.. నిమిషాలు గడుస్తున్నాయి.. పీఎస్‌ఎల్‌వీ నింగికెగిసిన 21.09 నిమిషాలకు మిషన్‌ కంట్రోల్‌ సెంటర్‌లో ఒక్కసారిగా హర్షధ్వానాలు మిన్నంటాయి. భారతదేశ తొలి స్పేస్‌ అబ్జర్వేటరీ ‘ఆస్ట్రోశా ట్‌’ ఉపగ్రహం సహా మరో 6 విదేశీ ఉపగ్రహాలను పీఎస్‌ఎల్‌వీ విజయవంతంగా అంతరిక్షంలోకి చేర్చింది. ఎలాంటి ఒడిదుడుకులు లేకుండా నాలుగు దశల మోటార్లతో ప్రయాణిస్తూ 21.09 నిమిషాలకు 650 కిలోమీటర్ల ఎత్తుకు చేరి ఆస్ట్రోశా ట్‌ సహా ఆరు విదేశీ ఉపగ్రహాలను రోదసిలోకి నెట్టి రాకెట్‌ విడిపోయింది. 22.51 నిమిషాలకు అదే ఎత్తులో ఆస్ట్రోశా ట్‌మిగిలిన ఆరు విదేశీ ఉపగ్రహాల నుంచి విడిపోయింది. 23.01 నిమిషాలకు లపాన్‌-ఏ2 (ఇండోనేషియా), 23.45 నిమిషాలకు ఎన్‌ఎల్‌ఎస్‌-14 (కెనడా), 24.03 నిమిషాలకు అమెరికాకు చెందిన లెమూర్‌-1, 24.11 నిమిషాలకు లెమూర్‌-2, 25.02 నిమిషాలకు లెమూర్‌-3, 25.53 నిమిషాలకు లెమూర్‌-4 ఉపగ్రహాలు విడిపోయాయి. భూమికి 650 కిలోమీటర్ల ఎత్తులో భూమధ్యరేఖకు 6 డిగ్రీల వాలులోని కక్ష్యలో ఈ ఉపగ్రహాలు స్థిరపడ్డాయి. వెంటనే బెంగుళూరు ఇస్ట్రాక్‌లోని మిషన్‌ ఆపరేషన్స్‌ కాంప్లెక్స్‌ (ఎంవోఎక్స్‌) ఆస్ట్రోశా ట్‌ ఉపగ్రహాన్ని తన నియంత్రణలోకి తెచ్చుకొంది.ఎంవోఎక్స్‌ సిబ్బంది ఉపగ్రహంలోని రెండు సోలార్‌ ప్యానళ్లను విచ్చుకొనేలా చేశారు. తాజాగా ప్రయోగించిన 6 విదేశీ ఉపగ్రహాలతో భారతదేశం ఇప్పటి వరకు ప్రయోగించిన విదేశీ ఉపగ్రహాల సంఖ్య 51కి చేరింది. ఇవి జర్మనీ, ఫ్రాన్స్‌, బ్రిటన్‌ తదితర 20 దేశాలకు చెందినవి. తాజా ప్రయోగానికి ఇస్రో రూ.328 కోట్లు ఖర్చు చేసింది. రాకెట్‌ తయారీకి రూ.150 కోట్లు, ఆస్ట్రోశా ట్‌ఉపగ్రహ తయారీకి రూ.178 కోట్లు ఖర్చుచేశారు. అయితే విదేశీ ఉపగ్రహాలను ఈ రాకెట్‌ ద్వారా ప్రయోగించడంతో విదేశీ మారకద్రవ్యం సమకూరనుంది.

మళ్ళి కం(భు)పించిన - నేపాల్ !

ఖాట్మండు, మే 12: గత నెల భయోత్పాతం తీరకముందే నేపాల్ మరోసారి భయకంపితమైంది. 8వేల మందిని బలిగొన్న ఏప్రిల్ 25నాటి భూకంపం నుంచి తేరుకోకముందే మరో భూకంపం తాకిడికి నేపాల్ వణికిపోయంది. రిక్టర్ స్కేలుపై 7.3 పాయింట్ల తీవ్రతతో పెను భూకంపం, అనంతరం భారీ తీవ్రతతో అయిదు ప్రకంపనలు సంభవించడంతో కనీసం 42 మంది మృతి చెందగా, వెయ్యి మందికి పైగా గాయపడ్డారు. ఖాట్మండుకు ఈశాన్యంగా మారుమూల పర్వత ప్రాంత జిల్లాలను కుదిపేసిన తాజా భూకంపంలో 42 మంది మృతి చెందగా మరో 1117 మంది గాయపడినట్లు నేపాల్ హోం మంత్రిత్వ శాఖ ప్రకటించింది. మంగళవారం మధ్యాహ్నం 12.35 గంటలకు ఖాట్మండుకు 83 కిలోమీటర్లు తూర్పుగా ఎవరెస్టు పర్వతానికి సమీపంలో భూమి అడుగున 15 కిలోమీటర్ల లోతులో ఈ భూకంపం సంభవించినట్లు అమెరికా భూభౌతిక సర్వే కేంద్రం (యుఎస్‌జిఎస్) తెలిపింది. రిక్టర్ స్కేలుపై భూకంపం తీవ్రత 7.4 పాయింట్లుగా మొదట పేర్కొన్న ఈ కేంద్రం ఆ తర్వాత దాన్ని 7.3 పాయింట్లకు సవరించింది. గత నెల వచ్చిన తీవ్ర భూకంపం తాకిడికి బాగా దెబ్బతిన్న దోలాఖా, సింధుపాల్ చాక్ జిల్లాల్లోనే తాజా భూకంపం ప్రభావం ఎక్కువగా ఉన్నట్లు తెలుస్తోంది. దోలాఖా జిల్లాల్లో ఇప్పటివరకు అందిన సమాచారాన్ని బట్టి కనీసం 18 మంది చనిపోయినట్లు పోలీసులు చెప్పారు.

తొలి భూకంపం సంభవించిన అరగంటకు రిక్టర్ స్కేలుపై 6.3 పాయింట్ల తీవ్రతతో మరోసారి భూమి కంపించడంతో ఖాట్మండులో ఇళ్లలో ఉంటున్న జనం భయంతో వీధుల్లోకి పరుగులు తీశారు. రెండో ప్రకంపన వచ్చిన తర్వాత రిక్టర్ స్కేలుపై 5 పాయింట్లకన్నా ఎక్కువ తీవ్రతతో మరో అయిదు ప్రకంపనలు వచ్చాయని అమెరికా భూభౌతిక సర్వే తెలిపింది. ఖాట్మండులో అరడజనుకు పైగా భవనాలు కుప్పకూలినట్లు పోలీసులు తెలిపారు.

తాజా భూకంపం గత నెల 25న రిక్టర్ స్కేలుపై 7.9 పాయింట్ల తీవ్రతతో సంభవించిన పెను భూకంపం తాకిడికి నిలువ నీడను సైతం కోల్పోయి ఆరుబయటే రోజులు గడిపేస్తున్న వేలాది బాధితులను మరింత భీతావహానికి గురి చేసింది. గత నెల సంభవించిన పెను భూకంపం తాకిడికి 8 వేల మందికి పైగా చనిపోగా వేలాది భవనాలు నేలమట్టం కావడమే కాక వందలాది గ్రామాలు తుడిచిపెట్టుకుపోయిన విషయం తెలిసిందే. అందుబాటులో ఉన్న మొత్తం హెలికాప్టర్లను వైద్య బృందాలు, ప్రత్యేక సహాయ, పునరావాస దళాలను త్వరలోనే దోలాక, సింధుపాల్‌చాక్ జిల్లాల్లో మోహరించనున్నట్లు నేపాల్ జాతీయ ఎమర్జెన్సీ సెంటర్ తెలియజేసింది. భారత వైమానిక దళం నేపాల్‌లో ఎనిమిది హెలికాప్టర్లను ఉంచగా, అందులో ఒకటి ఈ రోజు భూకంపం వచ్చిన తర్వాత ఏరియల్ సర్వే కూడా నిర్వహించింది.

భూకంపం తర్వాత నేపాల్‌లోని త్రిభువన్ అంతర్జాతీయ విమానాశ్రయాన్ని కొద్దిసేపు మూసేసి ఖాట్మండుకు వచ్చే విమానాలన్నిటినీ వేరే ప్రాంతాలకు మళ్లించారు. రెండు వారాల పాటు అన్ని పాఠశాలలను మూసేయాలని అధికారులు ఆదేశించారు. ఖాట్మండులో ప్రకంపనల తీవ్రత ఎక్కువగా ఉండడంతో జనం భయంతో ఇళ్లలోంచి బైటికి పరుగులు తీసారు. కొంతమంది అయితే భయంతో గట్టిగా ఏడుస్తూ కేకలు పెట్టడం కనిపించింది. తమ ఇళ్లకు తిరిగి వెళ్లవద్దని, ఆరుబయలు ప్రదేశాల్లోనే ఉండాలని అధికారులు ప్రజలకు విజ్ఞప్తి చేసారు. గత నెల 25న సంభవించిన పెను భూకంపం తర్వాత ఇప్పటివరకు 80కి పైగా ప్రకంపనలు వచ్చిన నేపాల్‌లో తాజా భూకంపం తాకిడికి పెద్ద ఎత్తున కొండచరియలు విరిగిపడ్డమే కాక పలు భవనాలు కుప్పకూలిపోయాయి. గత నెల సంభవించిన భూకంపంలో గాయపడిన వందలాది మంది చికిత్స పొందుతున్న ఖాట్మండులోని ప్రధాన ఆస్పత్రిలో మళ్లీ గాయాలు కాకుండా ఉండడం కోసం ముందు జాగ్రత్త చర్యగా వారిని వీల్ చైర్లలో బైటికి తీసుకు వచ్చారు.

అమెరికా ప్రతిపాదన ఆమోదం కాదు - జి 33 స్పష్టీకరణ

జెనీవా, మార్చి 22: అభివృద్ధి చెందుతున్న దేశాల్లో ఆహార భద్రత కోసం ఆహార ధాన్యాలను ప్రభుత్వం నిల్వ చేయడం అనే చిక్కు సమస్యకు శాశ్వత పరిష్కారం కోసం అమెరికా తాజాగా చేసిన ఒక ప్రతిపాదనను భారత్‌తో పాటుగా జి-33 గ్రూపు (అభివృద్ధి చెందుతున్న దేశాల కూటమి)లోని పలు దేశాలు ఈ అంశంలో ప్రపంచ వాణిజ్య సంస్థ (డబ్ల్యుటిఓ)లో ఈ ఏడాది ఏర్పాటు చేసిన రెండవ అనధికారిక సమావేశంలో తీవ్రంగా వ్యతిరేకించాయి. అమెరికా ప్రతిపాదన వల్ల అభివృద్ధి చెందుతున్న దేశాలు ఎలాంటి ఆహార భద్రతా కార్యక్రమాలను అమలు చేయాలో సూచించే స్థితి ఏర్పడుతుందని, ఇప్పుడున్న విధానంలో అలాంటిది లేదని భారత్ పేర్కొంది. ఆహార భద్రత సమస్యను పరిష్కరించేందుకు చేసే ఏ ప్రతిపాదన అయినా ప్రభుత్వమే ఆహార ధాన్యాలను నిల్వ చేసేదిగా ఉండాలని మన దేశం వాదించింది. ఆహార భద్రతా అవసరాల కోసం ప్రభుత్వాలు ఆహార ధాన్యాలను నిల్వ చేయడం అనేది వాణిజ్యానికి ఏలాంటి హాని చేయని లేదా అతి తక్కువ హాని చేసేవిగా ఉండాలని భారత్‌తో పాటుగా చైనా, ఫిలిప్పీన్స్ లాంటి జి-33 గ్రూపు దేశాలు వాదించాయి. జైనీవాలోని డబ్ల్యుటిఓలో శుక్రవారం ఈ అంశంపై ప్రత్యేకంగా ఏర్పాటు చేసిన రెండో సమావేశంలో జి-33 గ్రూపు దేశాలు అమెరికా ప్రతిపాదనపై చర్చించాయి. ఈ సమస్యపై సభ్య దేశాల మధ్య ఒక ఒప్పందాన్ని సాధించడం కోసం చేసిన అనేక ప్రతిపాదనల్లో ఇది కూడా ఒకటి. ఇప్పుడు ఆహార భద్రతా కార్యక్రమాలు ఏ మేరకు సమర్థవంతంగా పని చేస్తున్నాయి, వాణిజ్యంపై అవి ఏ మేరకు ప్రభావం చూపిస్తాయో, ఏ మేరకు లక్ష్యాలను సాధించాయో సమీక్ష చేయడం, డబ్ల్యుటిఓలో ఇప్పుడున్న నిబంధనల కారణంగా ఆహార భద్రతా కార్యక్రమాలను అమలు చేయడంలో ఎదుర్కొంటున్న, ఎదురు కాబోయే సమస్యలను గుర్తించడం, ఆహార ధాన్యాలను నిల్వ చేయడంలో ప్రపంచవ్యాప్తంగా పాటిస్తున్న అత్యుత్తమ విధానాలను, సిఫార్సులను క్రోడీకరించడం అనే మూడు ప్రధాన అంశాలు ఈ ప్రతిపాదనలో ఉన్నాయి. కాగా, సమస్యకు శాశ్వత పరిష్కారం కనుగొనాలి అనేదే అసలు సమస్య తప్ప కేవలం చర్చలు జరపడం లేదా ఇప్పుడు అమలవుతున్న కార్యక్రమాలను సమీక్షించడానికి అధికారాలను విస్తృతం చేయడం కాదని జి-33 గ్రూపు తరఫున మాట్లాడుతూ ఇండోనేసియా అభిప్రాయపడింది. ఈ సమస్యకు సంబంధించి జి-33 ప్రతిపాదనగా పిలవబడే మరో ప్రతిపాదనను సమర్థించే దేశాలు, వ్యతిరేకించే దేశాల మధ్య విభేదాలు ఈ సమావేశంలో మరింత స్పష్టంగా కొట్టొచ్చినట్లు కనిపించాయి. ఆహార ధాన్యాలను నిల్వ చేయడానికి ప్రభుత్వం పేద రైతులనుంచి మద్దతు ధర చెల్లించి ఆహార ధాన్యాలను కొనుగోలు చేసే కార్యక్రమాలకు మరిన్ని వెసులులుబాట్లు కల్పించడం కోసం వ్యవసాయ ఒప్పందాన్ని సవరించాలని జి-33 గ్రూపు ప్రతిపాదన సూచిస్తోంది.

సరిహద్దు సమస్యపై

నేడు భారత్, చైనా చర్చలు

బీజింగ్/న్యూఢిల్లీ, మార్చి 22: సరిహద్దు సమస్యలను పరిష్కరించుకునేందుకై భారత్, చైనా సోమవారం న్యూఢిల్లీలో 18వ విడత చర్చలు జరుపనున్నాయి. కేంద్రంలో గత ఏడాది ప్రధాన మంత్రి నరేంద్ర మోదీ నేతృత్వంలోని ఎన్‌డిఎ ప్రభుత్వం అధికార పగ్గాలు చేపట్టిన తర్వాత ఉభయ దేశాల మధ్య ఈ చర్చలు జరగడం ఇదే తొలిసారి. వాస్తవాధీన రేఖ (ఎల్‌ఎసి)పై స్పష్టతకు రావడంపై ఈ చర్చల్లో భారత్, చైనా దృష్టి సారిస్తాయని భావిస్తున్నారు. ఉభయ దేశాల మధ్య దీర్ఘ కాలం నుంచి నలుగుతున్న సరిహద్దు సమస్యపై భారత ప్రభుత్వ ప్రత్యేక ప్రతినిధి, జాతీయ సలహాదారు అజిత్ దోవల్ చైనా ప్రతినిధి, స్టేట్ కౌన్సిలర్ యాంగ్ జియెచీతో చర్చలు జరుపుతారు.

ముషారఫ్‌కు అరెస్టు వారెంట్

ఇస్లామాబాద్, మార్చి 10: హత్య కేసులో ఇంతవరకూ కోర్టుకు హాజరుకాకపోవడాన్ని తప్పుపడుతూ పాక్ మాజీ అధ్యక్షుడు పర్వేజ్ ముషారఫ్‌కు ఇక్కడి కోర్టు అరెస్టు వారెంట్ జారీచేసింది. తరచూ మినహాయింపులు కోరుతూ ఇంతవరకు కోర్టు విచారణకు హాజరుకాకపోవడంతో ఆగ్రహించిన అడిషనల్ సెషన్స్ న్యాయమూర్తి వాజిద్ అలీఖాన్ బెయిల్‌తో కూడిన అరెస్టు వారెంట్‌కు ఆదేశించారు. తదుపరి విచారణను ఏప్రిల్ 2వ తేదీకి వాయిదా వేసిన న్యాయమూర్తి, ఆ రోజున కోర్టుకు తప్పనిసరిగా హాజరుకావాలని ఆదేశించారు. లాల్ మసీదు మతపెద్ద ఘాజి అబ్దుల్ రషీద్ హత్య కేసులో ముషారఫ్ ఆరోపణలు ఎదుర్కొంటున్నారు. ఈ కేసులో ముషారఫ్‌పై 2013లో పోలీసులు కేసు నమోదు చేశారు. 2007లో ఉగ్రవాదుల ఏరివేత పేరుతో జరిగిన ఆర్మీ ఆపరేషన్‌లో ఇస్లామాబాద్‌లోని లాల్ మసీదు మతపెద్ద రషీద్‌ను హతమార్చారు. ఈ కేసు విచారణ సందర్భంగా ఇంతవరకు హాజరుకాని ముషారఫ్, అనారోగ్యం, భద్రత పేరుతో మినహాయింపు కోరుతూ వచ్చారు. అయితే, ఏప్రిల్ 2న జరగబోయే తదుపరి విచారణకు ముషారఫ్ కోర్టుకు హాజరవుతారా లేదా అన్నది ఇంకా స్పష్టం కాలేదు. 1999 నుంచి 2008 మధ్య పాక్‌ను పాలించిన 72 ఏళ్ళ సైనిక పాలకుడు ముషారఫ్ వరుస కేసులను ఎదుర్కొంటున్న విషయం విదితమే

పర్యావరణ మార్పూ పెను ముప్పే - ప్రధాని మోడీ

విక్టోరియా, మార్చి 11: ప్రపంచానికి ఉగ్రవాదం ఎలా తీవ్రమైన ముప్పో, సిషెల్స్ లాంటి దీవుల దేశాలకు పర్యావరణ మార్పులు కూడా అంతే ముప్పని ప్రధాని నరేంద్ర మోదీ అన్నారు. భూతాపాన్ని ఎదుర్కోవడానికి భారత దేశం పూర్తిగా కట్టుబడి ఉందని కూడా ఆయన చెప్పారు. ‘మనం ఉగ్రవాదం గురించి ఎలా చర్చిస్తున్నామో పర్యావరణ మార్పు గురించి చర్చించడానికి ప్రపంచ దేశాలన్నీ ఒక్కటి కావాలి’ అని బుధవారం ఇక్కడి పలైస్ డెస్ స్పోర్ట్స్‌లో తనకు జరిగిన పౌర సన్మానం సందర్భంగా మోదీ అన్నారు. అణు బాంబును ఎవరు తయారు చేస్తున్నారనే లాంటి విషయాలు దీవుల దేశాల ప్రజలకు పట్టదని, అయితే భూతాపం గురించి మాత్రం వాళ్లు ఆందోళన చెందుతారని, ఎందుకంటే అది వారి మనుగడతో ముడిపడిందని ప్రధాని అన్నారు. ‘ఈ రోజు దీవుల్లో ఉండే చిన్న చిన్న దేశాలు అణుబాంబును ఎవరు తయారు చేస్తున్నారనే దాని గురించి చర్చించుకోవు కానీ భూతాపం గురించి మాత్రం ఆలోచిస్తాయి. ఎందుకంటే ఇది ఇలాగే కొనసాగితే తాము బతికి ఉంటామో లేదో, తమ దీవి నీటిలో మునిగి పోతుందేమోనని వారి భయం. ప్రపంచాన్ని రక్షించడానికి దీవుల్లో నివసించే వారే కాకుండా మొత్తం ప్రపంచ దేశాలు దీని గురించి చర్చించడమే కాకుండా దీన్ని ఎదుర్కోవడానికి కృషి చేయాలి. ఉగ్రవాదం గురించి ప్రపంచం ఏ స్థాయిలో చర్చిస్తూ ఉందో పర్యావరణ మార్పు గురించి కూడా అదే స్థాయిలో చర్చించాలి’ అని మోదీ అన్నారు. కాగా, పర్యావరణ మార్పును ఎదుర్కోవడానికి భారత దేశం పూర్తిగా కట్టుబడి ఉందని అంతకు ముందు ప్రధాని చెప్పారు. ‘పర్యావరణ మార్పుపై మా రెండు దేశాల అభిప్రాయాలు ఒకటే. దాని ప్రభావానికి గురవుతున్న దేశాలు మావి’ అని సిషెల్స్ అధ్యక్షుడు జేమ్స్ అలిక్స్ మైఖేల్‌తో చర్చల అనంతరం విలేఖరులతో మాట్లాడుతూ మోదీ అన్నారు. గత 34 ఏళ్లలో ఒక భారత ప్రధాని సిషెల్స్‌లో అధికారికంగా పర్యటించడం ఇదే మొదటిసారి.

నాలుగు ఒప్పందాలపై సంతకాలు

కాగా ప్రధాని మోదీ పర్యటన సందర్భంగా మనదేశం సిషెల్స్‌తో నాలుగు ఒప్పందాలను కుదుర్చుకుంది. చమురు, సహజ వాయు నిల్వలను గుర్తించడంలో, సంప్రదాయేతర ఇంధనం, వౌలిక సదుపాయాల అభివృద్ధి ఇతర దేశాలకు విక్రయించడం కోసం సంయుక్తంగా నేవిగేషన్ చార్టులు, ఎలక్ట్రానిక్ నేవిగేషన్ చార్టులు రూపొందించడం ఈ ఒప్పందాల్లో ఉన్నాయి. కాగా, ఆ దేశంలో భద్రతా సహకారాన్ని పెంపొందించుకోవడంలో భాగంగా తీర ప్రాంత గస్తీ రాడార్ ప్రాజెక్టును సైతం ప్రధాని ప్రారంభించారు. సిషెల్స్ రాజధాని మాహే దీవిలో మొట్టమొదటిసారిగా ఏర్పాటు చేసిన ఈ తీర ప్రాంత గస్తీరాడార్ వ్యవస్థ రెండు దేశాల మధ్య సహకారానికి మరో గుర్తుగా భావించవచ్చు. అంతేకాకుండా సిషెల్స్‌కు రెండవ డార్నియర్ విమానాన్ని ఇవ్వడానికి, ఆ దేశ పౌరులకు మూడు నెలల కాలానికి ఉచిత వీసాలను అందించడానికి కూడా మన దేశం అంగీకరించింది.

నిర్మల భారత్ సాధన కోసం మరుగుదొడ్లు,మూత్రశాలలూ విస్తారంగా నిర్మించాలి....

నిర్మల భారత్ సాధన కోసం మరుగుదొడ్లు,మూత్రశాలలూ విస్తారంగా నిర్మించాలి....

బహిరంగంగా చర్చించుకోవడానికి ఇష్టపడని విషయాల్లో మల మూత్ర విసర్జన అంశం ఒకటి. కనీస సౌకర్యాలు లేకపోవడం వల్ల కలిగే అనర్థాలపై చాలామందికి అవగాహన లేదు. అందుకే దీనిని అప్రధాన అంశంగా భావిస్తూ సమస్యను దాటవేస్తుంటారు. పట్టణ ప్రాంతాల్లో జనసమ్మర్దం ఎక్కువగా ఉండే బస్టాండులు, రైల్వేస్టేషన్లలో తగినన్ని మరుగుదొడ్లు లేకపోవడం, వాటి నిర్వహణలో లోపాల వల్ల కలిగే ఇబ్బంది అంతా ఇంతా కాదు. కలిమి కలిగినవారికి ఇదొక సమస్య కాకపోవచ్చు కాని, పట్టణ ప్రాంత మురికివాడల్లోని పేద ప్రజలకు, గ్రామీణ ప్రాంత వాసులకు ఇదొక తీవ్ర సమస్యే. ప్రపంచవ్యాప్తంగా ఆరుబయట మల విసర్జన చేసే ప్రజల్లో అరవై శాతం మన దేశానికి చెందినవారే. మరుగుదొడ్ల సౌకర్యం లేని కారణంగా అధికంగా ఇబ్బందుల పాలవుతోంది మహిళలే. చీకట్లో తప్ప మల విసర్జనకు అవకాశం లేని పరిస్థితుల్లో వీరు- అనేక వ్యాధుల బారిన పడుతున్నారు. మలబద్దకం, మొలల సమస్య, అజీర్ణం వంటి సమస్యలకు ఇది కారణమవుతోంది. ఆరు బయట మల విసర్జన జరిగే ప్రాంతాల్లో పాదరక్షలు లేకుండా తిరగడం వల్ల బద్దెపురుగు బాక్టీరియా సోకే అవకాశం ఉంది..
వివిధ రాష్ట్రాల్లో విసర్జకాలను ఎత్తిపోయవలసిన మరుగుదొడ్లు ఉండటం వల్ల, ఆ పనికి మనుషుల్నే ఉపయోగిస్తున్నారు. ఈ అమానవీయ వృత్తిని నిషేధిస్తూ కేంద్ర ప్రభుత్వం 1993లో ఒక చట్టాన్ని రూపొందించింది. ఈ చట్టం డ్రై లెట్రీన్స్‌ నిర్మాణాన్నీ నిషేధించింది. కానీ, ఇప్పటికీ వాటి నిర్మాణం కొనసాగుతూనే ఉంది. ఈ వృత్తిపై నిషేధం, అందులో ఉన్న వారి ఉపాధికి సంబంధించిన తాజా బిల్లును కేంద్ర క్యాబినెట్‌ మొన్న ఆగస్టులో ఆమోదించింది. ఈ వృత్తిలో సుమారు పదమూడు లక్షల మంది కొనసాగుతున్నారు. లాభాల బాటలో నడుస్తున్న రైల్వే శాఖ సైతం విసర్జకాన్ని ఎత్తివేయడానికి మనుషుల్నే ఉపయోగిస్తోంది. ప్రత్యామ్నాయాలను అన్వేషించడంలో ఈ శాఖ దశాబ్దాలుగా నిర్లక్ష్యం వహిస్తోంది. ఫలితంగా ప్రపంచంలోనే 'అతిపెద్ద ఆరుబయట మరుగుదొడ్డి'గా భారత రైల్వే శాఖ అపకీర్తిని మూటకట్టుకుంది.
మన దేశంలో శిశు మరణాలకు ప్రధాన కారణం డయేరియా, శ్వాసకోశ వ్యాధులు. మల విసర్జన తరవాత సబ్బుతో చేతులు కడుక్కునే చిన్న చర్య ద్వారా డయేరియాని 40శాతం, శ్వాసకోశ వ్యాధులను 30శాతం తగ్గించవచ్చని నిపుణులు చెబుతున్నారు. మరుగుదొడ్ల వినియోగం లేకపోవడం, సరైన పారిశుద్ధ్య వసతులు లేకపోవడం వల్ల కలిగే అనారోగ్యంతో మనదేశం ఏటా 24,000కోట్ల రూపాయల మేరకు నష్టపోతోంది.మన రాష్ట్రంలోని చాలా పట్టణాల్లో మరుగుదొడ్ల పారిశుద్ధ్య నిర్వహణ అధ్వానంగా ఉంది. రాష్ట్రంలోని సగం పాఠశాలల్లో మరుగుదొడ్ల సౌకర్యం లేదు. అరవై ఆరు శాతం పాఠశాలల్లో అమ్మాయిలకు శౌచాలయ సౌకర్యం లేదు. మరుగుదొడ్లు ఉన్నా వాటి నిర్వహణ లోపం వల్ల అవి నిరుపయోగమవుతున్నాయి. అమ్మాయిలు చదువు మానివేయటానికి ఇదీ ఓ కీలక కారణం.

                                                                                                                                      -వేణు గోపాల్. వి 

కేబుల్ వ్యాపారాన్ని భయపెడుతున్న 70 వేల కోట్ల రిలయెన్స్ 'జియో'

కేబుల్ వ్యాపారాన్ని భయపెడుతున్న 70 వేల కోట్ల రిలయెన్స్ 'జియో'

రిలయెన్స్ జియో పేరుతో 70 వేల కోట్ల పెట్టుబడులతో ప్రారంభమవుతున్న 4G సేవలు కేబుల్, డిటిహెచ్ వ్యాపారాన్ని సమూలంగా తుడిచిపెట్టే ప్రమాదముందని తేలడంతో కేబుల్ పరిశ్రమలో భయాందోళనలు మొదలయ్యాయి. బ్రాడ్ బాండ్ వ్యాపారానికి కూడా పెనుప్రమాదం ముంచుకొస్తోంది. అతి తక్కువ ధరలో వినియోగదారులకు అత్యధిక సేవలందించటం ధ్యేయమంటున్న రిలయెన్స్ ఒక విప్లవం తీసుకురాబోతున్నదన్నది మాత్రం నిజం.
ఇంతకీ రిలయెన్స్ జియో అందించేదేమిటి ? కేవలం ఒక డేటా కార్డ్ లాంటి పరికరం సాయంతో టీవీ చానల్స్ ప్రసారాలు అందుతాయి. కేబుల్ అవసరమే ఉండదు. ఇది వైర్ లెస్. డిటిహెచ్ తరహాలో డిష్ పెట్టుకోవాల్సిన అవసరం కూడా లేదు. కోరుకున్న చానల్స్ కు మాత్రమే డబ్బు చెల్లించవచ్చు. నెలనెలా రీచార్జ్ చేసుకోవటమే. డిజిటల్ నాణ్యత. కారులో టీవీ ఉన్నా ప్రసారాలు అందుతాయి. ఇక మీదట బస్సుల్లో ఉండే టీవీ సెట్లలోనూ రిలయెన్స్ జియో సాయంతో చానల్స్ ప్రసారాలు చూడవచ్చు. టీవీ కార్యక్రమాలు రికార్డ్ చేసుకునే సౌకర్యం కూడా ఉంటుంది.
ఇది ఇంతవరకే పరిమితం కాదు. రిలయెన్స్ జియో అందించే డేటా కార్డ్/డాంగిల్ తీసుకొని మనకు కావాల్సిన ఇతర సౌకర్యాలు కూడా కలుపుకోవచ్చు. ఇంటర్నెట్ కనెక్షన్ కూడా తీసుకోవచ్చు. వై ఫై కనెక్టివిటీ కూడా పెన్ డ్రైవ్ పరిమాణంలో ఉండే అదే పరికరం అందిస్తుంది. టెలిఫోన్ కి కూడా ఇదే ఉపయోగపడుతుంది. అంటే సుమారు ఐదు వందల రూపాయాల్లో టీవీ, ఇంటర్నెట్, ఫోన్ సౌకర్యం ఇంటింటికీ అందించగలిగే బృహత్తర పథకం ఇది. దీని ప్రభావాన్ని ఇప్పటికిప్పుడు అంచనావేయటం కూడా కష్టమంటున్నారు మార్కెట్ నిపుణులు.
కొంతకాలంగా రిలయెన్స్ ఈ పథకాన్ని సిద్ధం చేసుకున్నప్పటికీ, బిజెపి అధికారంలోకి రాగానే కార్యాచరణ వేగవంతం చేసింది. దేశవ్యాప్తంగా ఉన్న ఫైబర్ ఆప్టిక్ నెట్ వర్క్ వాడుకుంటూ ఇప్పటికే దేశంలోని అనేక ప్రాంతాల్లో వై ఫై ని యాక్టివేట్ చేసింది. జియో కోసం పది వేలమంది పూర్తికాలపు ఉద్యోగులు పనిచేస్తుందగా మరో 30 వేలమంది నిపుణులు సేవలందిస్తున్నారు. పైగా ఈ నెట్ వర్క్ కోసం డిజిటల్ ఇన్ఫ్రా స్ట్రక్చర్ సమకూర్చటానికి లక్షమంది పనిచేస్తున్నారు. భారత్ లో అతిపెద్ద వ్యాపారాల్లో ఇది ఒకటి అవుతుందని అంబానీ అంటున్నారు.
ఈ ఆగస్టులో క్షేత్ర స్థాయిలో ప్రయోగాత్మకంగా సేవలు అందిస్తూ, వచ్చే జనవరి నుంచి వినియోగదారులకు అందుబాటులోకి తీసుకురావాలని నిర్ణయించారు. మొదటి విడతలోనే 90 శాతం ప్రజలకు అందేలా 5,000 పట్టణాల్లోనూ, 2,15,000 గ్రామాల్లోనూ జియో 4G సేవలు విస్తరిస్తారు. ఆ తరువాత మొత్తం ఆరులక్షల గ్రామాల్లో మిగిలిపోయినవాటికి అందిస్తారు. అంతర్జాతీయ ప్రమాణాలతో, భవిష్యత్తులో మరే ఇతర సాంకేతిక పరిజ్ఞానమూ దీనికి సాటిరాకుండా ఉండేలా అన్ని జాగ్రత్తలూ తీసుకుంటున్నామని ముఖేష్ అంబానీ చెబుతున్నారు.
ఈ భారీ ప్రాజెక్టు వలన కేబుల్ పరిశ్రమ తీవ్రంగా దెబ్బతింటుంది. ఇప్పటివరకు ఏర్పాటుచేసుకున్న మౌలిక వసతులన్నీ వృధా అవుతాయి. కేబుల్స్, కంట్రోల్ రూమ్స్, డిజిటల్ హెడ్ ఎండ్స్, సెట్ టాప్ బాక్స్ లు..ఇవన్నీ మూలనపడతాయి. ఈ నష్టాన్ని ఇప్పటికిప్పుడు అంచనావేయటం కష్టమే అయినా సగటున కనెక్షన్ కు రెండు వేల చొప్పున 15 కోట్ల కనెక్షన్లున్న కేబుల్ పరిశ్రమకు 30 వేలకోట్ల నష్టం ఉంటుంది. డిజిటైజేషన్ మీద వెచ్చించిన భారీ మొత్తాలతో కలుపుకుంటే ఇది 50 వేలకోట్ల పైమాటే. అదే సమయంలో డిటిహెచ్ సంస్థలకూ విపరీతమైన నష్టాలుంటాయి, ఇదంతా మౌలిక సదుపాయాలమీద పెట్టిన ఖర్చు మాత్రమే. ఈ పరిశ్రమలో ఉన్న లక్షలాది మంది ప్రత్యక్ష, పరోక్ష ఉద్యోగులు, స్వయం ఉపాధిగా మార్చుకున్నవారూ వీధినపడే ప్రమాదముంది.
రిలయెన్స్ జియో వలన ఒకవైపు కేబుల్, డిటిహెచ్, ఇంటర్నెట్ వ్యాపారాలకు పెనుముప్పు ఖాయమని అర్థమవుతున్నప్పటికీ వినియోగదారులకు కలిగే సౌకర్యం మాత్రం చాల ఎక్కువ. పైగా తక్కువ ధరలకే బహుళ సౌకర్యాలు అందటం మంచి పరిణామం. కానీ గుత్తాధిపత్యం కారణంగా ముందు ముందు వాటిల్లే ప్రమాదాన్ని పసిగట్టి ప్రభుత్వం తగిన ఆంక్షలు విధించకపోతే వినియోగదారులమీద క్రమంగా భారం పెరగవచ్చు. రిలయెన్స్ జియో 4G సేవల ప్రభావాన్ని గ్రహించటం వల్లనే ప్రభుత్వం డిజిటైజేషన్ విషయంలో వేగం తగ్గించిందన్న అనుమానాలు కూడా టీవీ పరిశ్రమలో మొదలయ్యాయి.

                                                                                                                                                  -శ్రీనాథ్ రెడ్డి 

మోదీని నేలకు దించిన ‘ఢిల్లీ’

న్యూయార్క్, ఫిబ్రవరి 11: ఢిల్లీ అసెంబ్లీ ఎన్నికల్లో బిజెపి ఘోర పరాజయం స్వదేశంలోనే కాదు, విదేశీ మీడియాలోనూ చర్చకు దారితీసింది. గత ఏడాది జరిగిన సార్వత్రిక ఎన్నికల్లో విజయఢంకా మోగించి చరిత్ర సృష్టించిన బిజెపి, పలు రాష్ట్రాల్లో జరిగిన అసెంబ్లీ ఎన్నికల్లో విజయ పరంపర కొనసాగించిన విషయం విదితమే. అయితే సాక్షాత్తూ దేశ రాజధానిలో హోరాహోరీగా సాగిన పోరులో బిజెపి అవమానకర రీతిలో ఓటమి చెందడాన్ని విదేశీ పత్రికలు ప్రముఖంగా ప్రస్తావించాయి. ఢిల్లీ ఎన్నికల ఫలితాలు ప్రధాని నరేంద్ర మోదీని నేల మీదకు తీసుకొచ్చాయని న్యూయార్క్ టైమ్స్ ఎడిటోరియల్ బోర్డు వ్యాఖ్యానించింది. ఆర్థిక, పాలనాపరమైన అంశాల్లో మోదీ ఇచ్చిన హామీల అమలులో తీవ్ర ఒత్తిడి పెరిగే పరిస్థితిని ఢిల్లీ ఫలితాలు తీసుకొచ్చాయని పేర్కొంది. అమెరికా అధ్యక్షుడు ఒబామా పర్యటన సందర్భంగా కుదుర్చుకున్న ఒప్పందాలతో దౌత్యపరంగా విజయం సాధించిన నరేంద్ర మోదీని దేశీయంగా జరిగిన ఎన్నికల ఫలితాలు వాస్తవంలోకి తీసుకొచ్చాయని పేర్కొంది. ‘ఎ డిఫీట్ ఫర్ నరేంద్రమోదీ’ శీర్షికతో ప్రచురితమైన సంపాదకీయంలో - 70మంది సభ్యులు కలిగిన ఢిల్లీ అసెంబ్లీ ఎన్నికల్లో మోదీ, బిజెపికి ఘోర పరాజయం ఎదురైందని న్యూయార్క్ టైమ్స్ వ్యాఖ్యానించింది.

అరవింద్ కేజ్రీవాల్ నాయకత్వంలోని కొత్త ప్రాంతీయ పార్టీ ఆమ్ ఆద్మీ (ఆప్) చేతిలో చిత్తుగా ఓడిపోయారని పేర్కొంది. 67 సీట్లతో ఆప్ విజయదుందుభి మోగించగా, కేంద్రంలో అధికారంలో వున్న బిజెపి మూడు సీట్లతో సరిపెట్టుకుందని తెలిపింది. గత ఏడాది జరిగిన సార్వత్రిక ఎన్నికల్లో మూడు దశాబ్దాల బిజెపి చరిత్రలో కనీవినీ ఎరుగని విజయాన్ని నమోదు చేసి జైత్రయాత్ర కొనసాగిస్తున్న నరేంద్ర మోదీని ఢిల్లీ ఫలితాలు నేలమీదకు తీసుకువచ్చాయని వ్యాఖ్యానించింది. ఢిల్లీ ఫలితాల వల్ల మోదీ సారధ్యంలోని కేంద్ర ప్రభుత్వంపై ఎలాంటి ప్రభావం చూపకపోయినా, ఆయన ఇచ్చిన హామీల అమలులో తీవ్ర ఒత్తిడిని ఎదుర్కొనే అవకాశం ఉందని పేర్కొంది. ఢిల్లీ ఎన్నికలు అంతర్జాతీయ దృష్టిని ఆకర్షించకపోయినా, గత ఏడాది జరిగిన సార్వత్రిక ఎన్నికల్లో జయభేరి మోగించిన నరేంద్ర మోదీ వరుస విజయాలను నమోదు చేసుకున్నారు. పలు రాష్ట్రాల్లో జరిగిన ఎన్నికల్లోనూ పార్టీకి విజయాన్ని చేకూర్చారు. అలాంటి నాయకుడ్ని ఢిల్లీ ఫలితాలు వాస్తవాన్ని గుర్తించేలా చేశాయని ఆ సంపాదకీయం వ్యాఖ్యానించింది.

టీ వీక్షణంతో అనర్థాలే

-వెంటాడనున్న ఒంటరితనం.. నిరుత్సాహం, ఊబకాయం సమస్యలు

-టెక్సాస్ యూనివర్సిటీ సర్వే వెల్లడి

టెక్సాస్, జనవరి 31: గంటలకొద్దీ అదే పనిగా టీవీ చూస్తున్నారా..? అయితే, ఈ వార్త మీకోసమే. ఎక్కువ సేపు టీవీ చూడటం అనర్థాలకు దారితీస్తుందని.. ముఖ్యంగా ఒంటరితనం, నిరుత్సాహంతోపాటు ఊబకాయ సమస్యలు వెంటాడుతాయని పరిశోధకులు పేర్కొంటున్నారు. ఇప్పటివరకు ఈ విషయంపై అనేక సర్వేలు జరిగినా.. తాజాగా టెక్సాస్ యూనివర్సిటీ నిర్వహించిన సర్వేలో మరికొన్ని కొత్త విషయాలు వెలుగుచూశాయి. మానసిక ఆరోగ్యం దెబ్బతినడంతో కూడా టీవీల్లో గంటలకొద్దీ వచ్చే మారథాన్, సీరియళ్లు అదేపనిగా చూస్తారని గుర్తించారు. 18నుంచి 29 ఏండ్ల వయస్సున్న 316మందిపై సర్వే చేయగా ఎక్కువగా టీవీ చూసేవారు నీరసంగా, ఒంటరితనంతో బాధపడుతున్నట్లు గమనించారు. ఈ సర్వేకు సారథ్యం వహించిన యూన్ హి సంగ్ అదేపనిగా టీవీ చూడటం తీవ్రమైన మానసిక సమస్య అని.. దీనినుంచి బయటకు రావడానికి మానసిక వైద్యుల సహాయం ఎంతైనా అవసరం ఉందని పేర్కొన్నారు.

నెత్తురోడిన పాక్ మస్జిద్ - ఉగ్రదాడికి 61 పౌరులు మృతి

కరాచీ, జనవరి 30: పాకిస్తాన్‌లోని సింథ్ రాష్ట్రం శక్తివంతమైన బాంబు పేలుడుతో నెత్తురోడింది. షికార్‌పూర్‌లోని లఖీదార్ ఏరియాలో మైనార్టీ షియా ముస్లిం తెగకు చెందిన మసీదులో శుక్రవారం ప్రార్థనలు జరుగుతుండగా సంభవించిన పేలుడులో పలువురు చిన్నపిల్లలు సహా దాదాపు 61మంది మృతిచెందగా, మరో 50మంది వరకు గాయపడ్డారు. పేలుడు ధాటికి మసీదు పైకప్పు కుప్పకూలడంతో దాని శిథిలాల కింద పలువురు సజీవ సమాధి అయ్యారు. మధ్యాహ్నం ప్రార్థనలు నిర్వహించేందుకు మసీదులోకి ప్రవేశించిన కొద్దిసేపటికే పేలుడు సంభవించిందని, దాడిలో 61మంది మృతిచెందగా, 50మంది వరకు గాయపడ్డారని, వీరిలో పలువురికి తీవ్ర గాయాలయ్యాయని సింథ్ రాష్ట్ర ఆరోగ్య శాఖ మంత్రి జామ్ మెహతాబ్ తెలిపారు. అనుమానిత యువకుడు ఒకరు మసీదులో ప్రవేశించిన తర్వాత పేలుడు జరిగిందని ఇన్‌స్పెక్టర్ జనరల్ రఖియో మిరానీ తెలిపారు. పేలుడును ఆత్మాహుతి దాడిగా ప్రయివేట్ ప్రసార మాధ్యమాలు పేర్కొన్నాయి. అయితే ఆ విషయం ఇంకా నిర్ధారణ కాలేదు.

కార్టూన్ల ప్రచురణ సరికాదు

మహమ్మదు ప్రవక్తను అవమానించే రీతిలో కార్టూన్లను ప్రచురించడాన్ని దాదాపు సగం మంది ఫ్రెంచ్ ప్రజలు వ్యతిరేకిస్తున్నట్లు ఆదివారం ప్రకటించిన ఓ సర్వే వెల్లడించింది. ఫ్రెంచ్ మ్యాగజైన్ చార్లీ హెబ్డో సిబ్బంది హత్యల తర్వాత భావప్రకటనా స్వేచ్ఛ పరిమితులపై ప్రపంచ వ్యాప్తంగా చర్చ జరుగుతున్న తరుణంలో ఈ పోల్ సర్వేను ప్రకటించడం గమనార్హం. మహ్మదు ప్రవక్తను అవమానించడంగా పలువురు ముస్లింలు భావించే అలాంటి కార్టూన్లను ప్రచురించకూడదని ‘ఐఫాప్’ నిర్వహించిన ఈ సర్వేలో పాల్గొన్న వారిలో 42 శాతం మంది అభిప్రాయపడ్డారు. కాగా, ఆన్‌లైన్‌లో సామాజిక మీడియా నెట్‌వర్క్‌లలో భావప్రకటనా స్వేచ్ఛకు పరిమితులు ఉండడాన్ని తాము సమర్థిస్తామని మరో 50 శాతం మంది చెప్పారు. అయితే ముస్లింలు వ్యతిరేకిస్తున్నారన్న కారణంగా కార్టూన్ల ప్రచురణను ఆపకూడదని 57 శాతం మంది అభిప్రాయ పడినట్లు ‘లీ జర్నల్ డు డుమాంచే’ పత్రికలో ప్రచురించిన ఆ సర్వే పేర్కొంది. కాగా, ఫ్రెంచ్ గడ్డపై ఉగ్రవాద కార్యకలాపాలకు పాల్పడే ద్వంద్వ పౌరసత్వం కలిగిన వారికి ఫ్రెంచ్ పౌరసత్వాన్ని రద్దు చేయాలన్న ప్రతిపాదనకు దాదాపు 81 శాతం మంది ముక్తకంఠంతో మద్దతు తెలపడం గమనార్హం.